නොම තරාහාවනු විමසමි මා ඔබ

නොම තරාහාවනු විමසමි මා ඔබ
කලකිනි හමුවූයේ ..
යෞවනයේ රුව හිමිවුන සේයා
සාඩම්බර මුහුණේ ...

ගුමු ගුමු නද දෙන වන සමනලුනේ
මලින් මලට සරනා ..//
නැත කිසි බාදා තොපහට අපගෙන්
ආයෙත් ඔහෙ නොයෙනා ..

අකුරට ගියෙ අප දෙදෙනා සමගින්
සමනොළ දිවි වරුණා ..//
කවට සිනා තොල් පෙති මුමුණා එයි
සුරඟන ලොවකි මනා ...

පාසල් කාළයේ ප්‍රේමයත් හරියට මේ වගේ..
කොයි වගේද..
මේ වගෙයි ..
හරියටම කියන්න බැරි උනත් ඒකෙ මොකක්ද්දෝ හුරුබුහුටි හැඩයක් තියනවා..ඔබ කොහේද කියල අද මමවත් මම කොහේද කියල ඔබවත් දන්නෙ නෑ..ඒත් ඒ අතීතෙ මට වගේම ඔබටත් මතක ඇති..

ඉස්කෝලෙන් අස් උනාට ආයෙත් එක දවසකට ඉස්කෝලෙ යන්න මටත් ආසයි..ඒ ඩෙස් පුටු.. ඒ ගස් වැල් අදනම් නැතුව ඇති..ඒත් ඒ අතීතය මුසුවෙච්ච ඔබේ සුවඳ මට දැනේවි කියල මට හිතෙනව..හැමෝටම ඒ වගේ පාසල් කාලයක් පාසල් ප්‍රේමයක් තියෙන්න ඇති..සමහරවිට ඒක ඒක පාර්ශවීය ප්‍රේමයක් වෙන්නත් පුළුවන් ..

 මේ ගීතයෙන් කියැවෙන්නෙත් අන්න එහෙම පාසල් ප්‍රේමයක් ගැන..
කාලයක් ගතවෙලා ...
දවසක ඔහුට ඇයව ආයෙමත් හමුවෙනව..එතකොට ඇය තරුණියක්..ඔහු ඇය හා සමග කතාකරනව .  ඒත් ඇයි ඔහු තරහවෙන්න එපා කියල ඇයට කියන්නේ..සමහරවිට මම මුලින් කිව්ව වගේ ඔහු ඒකපාර්ශ්විකව ඇයට ආදරය කලාද  එහෙම නැතිනම් ඔහු විසින්ම ඇයව අතහැරල දාල ගිය නිසාද..

නොම තරාහාවනු විමසමි මා ඔබ
කලකිනි හමුවූයේ ..
යෞවනයේ රුව හිමිවුන සේයා
සාඩම්බර මුහුණේ ...

කොහොම උනත් ගීතයක් විදියට මේ කතාව සුන්දරයි..ලොකු ලොකු වචන නැතිවුනාට සරළ කෙටි වදන් තුලින් බිහිවූ සුන්දර සරළ ගීයක්.
ෂර්ලි වෛජන්තගේ ගීයක් ගැන මීට පෙරත් කතා කරල තිබුණට මේ ගීය ඇසුවම ආයෙමත් මෙහි ලියන්න හිතුනා.ඔහු ගැයූ

මං බොළඳ වියේ බැඳි හාද ..
ඈත ක්ෂිතිජයේ ..
මා සිත මියුරු කල්පනා ..
දොර කව්ළුවෙන් එබී බලා ..
දෑසට හුරුවූ ඝන අඳුරින් ..

වැනි ගීත හිතට ගෙන එන්නේ සියුම් සතුටක් මුසු සංවේගයක්.. කතාවෙ විදියට මටත් කොහේදි හෝ ආයෙ ඔබව මුනගැසුනොත් කතාකරගන්න බැරි වෙයිද මංද ..

- ජගත් ප්‍රසන්න කුරුගම -
jagathkurugama.blogspot.com